siushanb的小天地*: 2月 2021

個個都去Staycation，而我疫情之後都冇去過Staycation，但又想抖吓氣放鬆吓，今次終於揾啱地點出發喇！仲要係我好鍾意嘅運動-可以環島馬灣踩單車！今次呢個係馬灣挪亞方舟度假酒店嘅兩日一夜單車樂悠食住玩套票。

近來港人特別鍾情戶外郊遊，遠離繁囂嘅馬灣，有唔少大自然美景及歷史文化遺蹟，仲有好多靚靚文青打卡秘境，越來越多人入嚟玩。由2月份開始，挪亞方舟度假酒店推出咗全新的「單車樂悠食住玩套票」Staycation，以全新角度體驗馬灣遊樂趣。

⮝難得入到馬灣梗係要打個卡

首先最主要講吓今次Staycation主題就係馬灣環島單車樂，可以圍住成個馬灣踩單車，當中有平路，亦都有一啲小路或者係馬路，所以都要小心留神！去到某啲位置係比較安全嘅打卡位就可以瘋狂影相，環境都幾好㗎！仲可以影到個海。啲單車好新淨，仲有好安全嘅頭盔提供，環島遊三個鐘基本上其實一個鐘已經玩晒～當然可以繼續兜多幾個圈，吹吓海風都幾爽！

⮝單車非常新淨

⮝出發嚕～

⮝沿路路線指示非常清晰

自騎單車環島遊全新角度探索馬灣

呢個「單車樂悠食住玩套票」，可以令我輕鬆探索馬灣多個優美風光與打卡熱點，例如可以到紅樹林濕地一帶觀察招潮蟹及彈塗魚，參觀三級歷史建築九龍關石碑，又可以到馬灣公眾碼頭觀賞汲水門大橋，又可以舊漁村影吓懷舊文青相。除了騎著單車，套票亦提供雙筒望遠鏡及路線指南地圖，等你可以慢慢體會馬灣嘅大自然環境。

⮝多個打卡位

小Tips：租用單車會建議可以揀退房日朝早10:30玩到11:30咁上下（呢個時間係最好，天氣冇咁熱，除非好好體力，一般都係玩一個鐘已經好足夠）；又或者入住當日check in後即刻玩，不過就要留意番套票內包括其他活動時段同埋食下午茶嘅時間。

除咗踩單車之外，Staycation當中餐飲亦都係我非常推薦嘅項目，套票當中真係包晒三餐！包括了入住當日嘅下午茶，晚餐以及第二朝早嘅自助早餐。我先按照時間順序分享一下！

⮝三餐均在豐盛閣（因入住當日晚市堂食依然暫停，所以Dinner轉咗Room service)

下午茶方面：

花語 · 春日海景下午茶（如非套票，單食$438@2位）

由即日起至3月31日供應，可以望住個海景嘆高質素下午茶真係一個唔錯嘅放假享受！可以安坐餐廳裡，就欣賞到青馬大橋、汀九橋及東灣沙灘 180度醉人海景，啱晒拖友或者同閨蜜一齊嚟盡情打卡。

⮝下午茶望出窗外海景景色

⮝打卡後再用餐

總共有10款不同的食品，包括五款鹹點，五款甜點，其實食下午茶我最擔心就是太多款式的甜點，感覺會太飽，或者太滯。但係佢呢個恰到好處，兩款各一半，令人感覺到剛剛好。

鴨肝慕絲配紅桑子啫喱酸酸甜甜而且鴨肝有鹹香，非常match！

三文魚籽松露醬釀蛋三文魚籽比較有鮮味，加上松露將啲香氣，令清新嘅蛋白層次更為豐富。

鮑魚雜菌酥盒上面有一隻小型鮑魚，配搭裏面嘅Juicy雜菌及乾爽鬆化酥盒，鹹鹹地又有少少清新。

意大利火腿脆片配鮮蜜瓜汁依個真係非常特別！平時食意大利火腿都係食濕嘅，但係佢呢個直情係脆片，加上佢個蜜瓜係做咗個蜜瓜汁，咁樣食個感覺好Fresh。

芒果龍蝦牛角酥比想像中夾好多，芒果比較甜香，龍蝦就鮮味十足，牛角酥香脆之餘亦都比較甜，小清新。

⮝鹹點五食

白桃甜品杯甜甜地又清新，有少少啫喱feel！

蛋白霜檸檬撻上面好香脆，但係食到入面有好香濃嘅檸檬醬，下面個批底都好脆身！

紫羅蘭野莓雲呢拿蛋糕我成個玫瑰花咁，打卡一流，野莓酸酸甜甜非常開胃。

士多啤梨軟芝士餅好得意嘅心形軟餅，芝士味比較香，甜甜地幾好味。

紅豆綠茶卷綠茶味道清香，加上有啲紅豆，細細件又夠鬆化。

⮝甜點五食

晚餐方面：

由於入住時，正值晚市堂食暫停嘅防疫措拖依然生效，未能到餐廳用餐，所以會改為在客房中用膳Room Service，可以選擇六點、六點半或者七點，餐飲實在太豐富，兩個人都未必食得晒。

6道菜的海陸盛匯精品晚餐 (適用於星期五、六及公眾假期) （如非套票，單食每位$478）

⮝好豐富的晚餐一定要打卡

⮝豐富晚餐

最令人驚喜嘅係佢有多款海鮮，刺身，鴨肝多士做前菜，主食亦有多款選擇可以於入住時決定。也有餐包，飲品，餐湯是龍蝦湯等等。

如果冇特別要求，大概八點左右會上甜品，甜品都有五款！

凍海鮮盤 ( 龍蝦 · 小白蝦 · 青口 · 扇貝)

個款海鮮都係比較清新嘅凍盤，份量都好多，有一隻龍蝦，四隻蝦，數隻青口及兩隻扇貝，本身味道比較鮮，較為淡口味，可以點上醬料提升豐富度及鮮味。

雜錦刺身

刺身方面有多款包括三文魚，吞拿魚，另外一款油甘魚及赤蝦刺身，整體頗有鮮味，有提供芥末及刺身豉油。

香煎鴨肝配黑醋醬

我最愛呢款係香煎鴨肝，非常香脆要趁熱食，而且裏面熱辣辣好濃郁嘅香氣，加上香脆多士及黑醋醬，多款水果包括草莓、藍莓等等，令整體口味清新得多。

龍蝦湯

龍蝦湯方面也是比較前期享用的，口味香濃，龍蝦味比較真。

自選主菜

胡椒香料煎牛肉眼配雜菌及洋葱醬

牛肉眼比想像中鬆化，而且胡椒等香料也比較香。旁邊的蔬菜類別非常有心思，整到好似一隻船，五成熟實屬不錯之選。

香煎比目魚柳配煙肉茄蓉及紫蘇薯蓉

比目魚柳表皮也較為香脆，魚肉質感香滑沒有骨，下面有好多煙肉番茄蓉，令層次更豐富。

甜品拼盤

玫瑰紅桑子蛋糕，茉莉牛奶朱古力蛋卷，綠茶奶凍，焦糖千層餅，榛子朱古力忌廉泡芙

甜品方面選擇很多，基本上胃口已經用清光，每樣最多試少少，我就比較喜歡榛子朱古力忌廉泡芙，外層榛子朱古力包裹着清新鬆化的忌廉泡芙，甜得來又清新！

茶或咖啡

選擇了凍檸茶，凍檸水，也是西餐的不錯飯後飲品。

早餐方面：

可以選擇在早上8:00到11:00內享用，基本都是自助形式，有中式西式，粥粉麵基本上都齊全，而且有嘢飲，例如橙汁、咖啡等等。（如非套票，單食每位$118）

假日任食經典早餐 (適用於六、日及公眾假期)

.⮝早餐景觀

.⮝選擇齊全

我比較喜歡吃啲包括了粥品，粥品比較特別是淮山粥，也可以自由配搭香蔥及脆片。另外也比較喜歡味增湯烏冬，比較有日式和風感覺，不過烏冬還是比較熱會更適合我。

黑松露炒蛋有很多人也吃，質感香滑而且黑松露味濃郁。旁邊也有很多肉類包括香腸、火腿、雜菜、豉油王炒麵，任人選擇。喜歡吃麵包或者沙律的也有多款選擇，例如同行男友就喜歡選擇了漢堡包及炸魚柳等等，不過我早餐還是比較喜歡中式/日式熱辣辣的。所以就不停拿取了粥品及黑松露炒蛋等。

除此之外亦有一些小型工作坊，非常有意思，不單止是staycation咁簡單。參加各式小清新工作坊如萌趣動物微景盆栽及Art Jamming，可以發揮吓我啲藝術天份，陶冶性情，令人特別relax。

套票包括了Art Jamming (另可自費製作T shirt )，導師好細心咁教導我哋用水彩去畫畫，可以參考其他人嘅圖片或者自己有圖片都可以嘗試起草圖，導師亦都會教我哋去調色同埋上色。如果比較複雜少少嘅圖畫需時大概1.5-2小時左右，因為我哋覺得都畫得好靚，所以加錢整咗兩件T-shirt 當情侶衫，出街都唔尷尬！

⮝一步一步完成Art jamming

⮝整完TEE直接穿去打卡

微景盆栽都係一個唔錯嘅體驗，平時冇乜種植物嘅經驗，都唔知原來做一盤植物係要咁多層，包括最低層嘅石仔，跟住一個吸水嘅層，普通植物泥土，濕泥土同埋最頂層用返白色嘅石仔令佢更美觀，原來都好多步驟㗎！而且除咗個盆栽本身好得意之外，仲有一啲小配件例如石仔，小飾物可以加在表面，咁就完成啦！我就會擺返Office令到公司更加有生氣 !

⮝先選好植物

⮝一步一步製作，完成！

除咗以上咁豐富嘅活動、美食之外，Staycation所住嘅客房都幾舒適，今次酒店幫我哋upgrade咗做特級豪華客房，最特別係總共有兩個廁所，四個洗手盆，兩個沖涼位，沖涼都唔使爭！仲配備寬闊露台可以行出去打卡影相唞吓氣，獨立空調系統都令人非常放心。當中亦包括咖啡/茶包，礦泉水，也有風筒，如果需要三腳叉電插頭可以向前台擺低$20按金借用。